除了黑色素仲有什麼會令膚色暗啞？(下) 胡蘿蔔素會影響膚色嗎？

CLEAN Blog – 除了黑色素仲有什麼會令膚色暗啞？(下) 胡蘿蔔素會影響膚色嗎？ 

上次分享過除了黑色素仲有什麼會令膚色暗啞（連結：http://clean-skincare.blogspot.hk/2017/04/blog-post_62.html）提及到血紅素會影響膚色，而今篇會同大家分享胡蘿蔔素點解會影響膚色喔。

胡蘿蔔素（Carotene），人體不能合成既營養之一，肉類亦未能提供，只能從蔬果植物裡吸收，如木瓜，橙，芒果，芥蘭，紅蘿蔔，西蘭花等。進食後會轉化變成維他命A，有助改善或預防眼睛毛病如：乾眼症，黃斑區病變，白內障等。。。，有抗氧化，保護血管，預防和抑制肺癌等功效。

但當吸收過量既胡蘿蔔素就會令皮膚變黃，類似黃膽病患者，但由於胡蘿蔔素既代謝係由皮脂線透過汗水排出，所以當吸收過量既胡蘿蔔素就會造成胡蘿蔔素沉澱（學名：Carotenoderma），胡蘿蔔素會沉澱於皮下脂肪（所以人類既脂肪係黃色），久而久之就會令皮膚呈現黃色，但由於胡蘿蔔素唔會沉澱於體內黏膜上，所以眼睛唔會呈現黃色，如果要分辯黃膽病同胡蘿蔔素沉澱，只需檢查眼睛有冇黃色就可以知道。

除左吸取過多胡蘿蔔素外，糖尿病，腎病，肝病和甲狀腺功能障礙病患者亦會較容易出現胡蘿蔔素沉澱，但胡蘿蔔素沉澱並唔會對人體構成健康問題，只會影響外觀。

只需減少進食含有胡蘿蔔素既食物就會慢慢減輕皮膚泛黃既情況，唔需要搽美白產品或進行任何療程，如果想加速減退就可以多做運動，提升身體既新陳代謝功能，咁就可以啦，但經過數星期後還未見有改善，建議檢查一下身體代謝功能哦，所以適量地進食蔬果係一件非常好既習慣，但要記住均衡飲食更重要喔！