止汗劑會令毛孔閉塞嗎？

CLEAN Blog：止汗劑會令毛孔閉塞嗎？

呢段時間香港天氣咁炎熱，身體既流汗量自然都會多咗~有時身體都會發出汗味，其實都幾尷尬！所以而家大部份既男士或女士都會有使用止汗劑既習慣，不過經常用止汗劑來克制汗水排放會唔會令毛孔閉塞？對身體有影響嗎？

我地身體既汗腺主要分別有兩種腺體，分為大汗腺同埋小汗腺：

• 『小汗腺』：液體分泌較少，排口位亦較細，主要係皮膚表皮而遍及全身，比如手掌，腳底，面額等等，而排出既99%主要係汗水，當中固體（如蛋白質）不到1%，所以小汗腺所流出既汗基本上係唔會產生異味，除非有細菌滋生．
• 『大汗腺』：排口位相對較大（3 – 5mm），除左排出液體外，蛋白質同脂肪酸亦會從大汗線排出，雖然呢兩種物質不含味道，但當排出體外同細菌接觸後就會產生刺激既味道了，而大汗腺主要分佈係腋窩和排泄器官．

而止汗劑主要成份係聚合氯化鋁（Aluminum chlorohydrate），當氯化鋁進入毛孔後會開始膨脹，阻塞汗腺排口，達到止汗作用，而聚合氯化鋁所含既量越多，止汗效果越明顯（衛生署既上限係25%），但係含量越高，令毛囊和汗腺排口閉塞而患上毛囊炎，暗瘡，增加皮膚色素沉澱等既風險亦高．

另外有一種叫體香劑（Body fragrance），作用有抗菌，消毒，散發香味，令汗水唔會因為接觸到細菌而產生異味，但冇止汗作用，而且某些產品含有酒精和人工香料成份，呢ｄ成份會有機會令皮膚敏感和增加皮膚色素沉澱而變黑哦．

其實出汗係人體既正常功能之一，作用係令皮膚降溫，排水，排泄等，如果用咗止汗劑後而會令皮膚和身體出現其他狀況，所以建議選用不含酒精既天然體香劑，減少細菌滋生從而減少產生異味．如排汗量較多既人，建議多帶1-2件衫出門替換，同埋帶一條手巾仔黎抹汗．另外以下事項亦可以加注意哦，咁就唔洗再因為體味而尷尬啦：

• 如保持身體清潔可以減低細菌滋生，所以運動後或戶外行走後而大量出汗，要儘快洗澡或抹乾，否則會令細菌滋生繁殖，產生異味．
• 注意飲食：唔好食過多既辛辣刺激性食物，因為會隨著身體既新陳代謝變化成汗液排出時散發較濃既氣味．或減少食過多肉類，因蛋白質同脂肪酸排出體外同細菌接觸後就會產生刺激既味道哦．
• 清洗後既衣服要確保係一個通風或有陽光既地方涼乾，相反就會容易滋生細菌，如衣服本身已經發出異味，再加上汗水，味道就會更加刺激哦．

免責聲明：以上所載的資料只供參考用途，均不能作為替代執業西醫的建議．在採取任何行動之前，你必須與有適當資格的執業醫療人仕諮詢．