請支持冇動物測試的產品

CLEAN 環保 – 請支持冇動物測試的產品

相信化妝對女士黎講係不可缺少既事，而唔同嘅化妝品牌都會經常推出一d新嘅顏色同包裝黎吸引消費者不斷購買，但廠商們一般為左避免新產品會令消費者產生敏感或其他不良反應，所以係研究製造呢d新嘅產品配方既時候，有機會利用到動物測試作為研究黎獲得相關認證，但購買呢種有經過動物測試既產品前不如先一齊了解下到底有冇呢個需要？而動物們究竟要經過乜野既測試呢？

平時一般買到嘅日常用品如：化妝品，護膚品，洗頭水，沐浴用品等，甚至乎一d家居清潔用品都有機會要經過動物測試，原因係產品公司推出新產品前，要先衡量人體長期使用同接觸嘅情況下而進行既測試，但為了必須確保產品唔會帶有刺激性，毒性以及令身體皮膚出現異常嘅反應先可推出，所以一般製造廠都會以動物實驗來證實安全測試並獲得相關認証，然後先再推出市面上．

雖然世界上有多個國家立法禁止化妝品作為全部或部份動物測試，但根據每年統計預算，仍然約有數十萬隻動物作為化妝品同其他原材料進行測試既『被測試品』，而現時中國使用實驗動物總量位於世界前列，因為中國政府係必須要通過動物測試後，產品先可進口或在當地進行買賣．

其實從1944年已經為人類產品而進行動物測試，較為多人認識既測試就係『德萊茲 (Draize)測試』，主要係用黎衡量產品對人類嘅眼睛同埋皮膚嘅刺激程度，一般係利用白兔同埋白老鼠做測試動物多，而測試分別為3個方式：

1. 眼睛刺激性測試：方法係將測試物（包括：化妝品，洗頭水，沐浴用品等）直接強迫滴入白兔眼睛再緊閉，原因係兔子既眼睛比人類更為敏感，所以如果兔子既眼睛冇出現過敏，咁就會被認為安全，但進行測試時期約長達十幾日不等，實驗過程中，唔單止會被鎖住同綁起，而且受到痛苦掙扎，最後眼睛已被傷害到不適合再作測試後就會『被安樂死』．
2. 皮膚刺激性測試：作用係觀察該種產品成份會否對人類皮膚引致任何不良反應而進行測試，過程要先將動物嘅毛剃光，然後搽上測試物質，同樣都需要時期約長達十幾日多，而實驗中嘅動物有機會引發皮膚發炎而造成傷口潰爛情況．
3. 半數致死量測試，（LD50-Median Lethal Dose）：係一種測試該物質有無毒既標準實驗，基本上每種測試都會利用到過百隻動物進行，方法係強迫餵食或者直接用吸管插入胃中，亦可能用皮下注射或強迫性吸入嘅方式進行測試，最後該動物會產生唔同既病症直到一半嘅動物死亡後，實驗先會結束，所以稱為 Lethal Dose 50% （ LD50）．

以上所有經過測試嘅動物都唔會得到任何嘅醫療同埋照顧，而且實驗完結之後，冇論健康與否，全部都會全部被安樂死．

其實而家呢個科技昌明既年代，世界上已經有唔少既科學家已經研究出取代動物測試產品嘅方法，而且更有報告指出，人類同白兔嘅眼睛構造唔相似，而動物同我地人類嘅皮膚組織亦都唔一樣，所以其實測試方法未必能達到可靠同埋準確嘅程度，不如我地大家換個角度諗諗點解要動物去受種種測試，然後要用佢地既生命黎換取一個商品既認証呢？其實市面上有某ｄ產品都係冇經過動物測試而亦會有標籤註明，所以希望大家一齊支持用冇動物測試嘅產品，為愛惜動物既生命而作出一點點力。