杏仁就聽得多，但黃杏係咩黎呢？

CLEAN Blog – 杏仁就聽得多，但黃杏係咩黎呢？

大家有時都會食杏仁呢種堅果小食，但大家有聽果黃杏嗎？新鮮既黃杏一般街市較為少見，超級市場亦不常見，但我一講呢種生果所製造出黎既乾貨相信大家都會知，所以今次想同大家分享下呢種食物。

黃杏（Apricot）又名杏桃，雖然原產地到而家仲存在爭議性，但網上文章顯示最早既原產國係亞美尼亞共和國（土耳其旁），而根據聯合國既資訊顯示2016年既最大出口國係烏茲別克斯坦（阿富汗對上），第二大就係土耳其啦。

而營養方面有維他命A（有保護眼睛和增強視力既作用，對皮膚則有抗氧化和抗衰老等作用）、維他命C和維他命K（對血管和骨骼既健康有幫助），除此之外仲有其他唔同既礦物質等營養。

但今篇主要講既係黃杏既核經過處理後就會變成我地中葯裡既南北杏啦，由於未經處理前會有一種物質叫苦杏仁苷(amygdalin），而呢種物質含有山埃毒性，所以一定要經過高溫處理後先能除去。

但南杏和北杏既分別又係點分？其實只不過係唔同品種既黃杏，北杏個頭較細，帶有苦味但香味較重，而南杏個頭偏大d，帶甜味而香味較淡。

咁至於我地經常食既杏仁堅果又係邊度黎？

呢種堅果係黎至扁桃（Prunus dulcis）同黃杏冇關，扁桃基本上只有果皮和果核，幾乎冇果肉和水份，只需將果實敲開就能見到杏仁了（如下圖）

另外提提大家鮮黃杏雖然唔多有，而乾黃杏會相對較易買到，如果想一試但又搵唔到鮮黃杏既話咁不妨考慮買乾黃杏啦，配麥皮一齊食都好好味哦。